EMRI/ U gjetën 2 depo ku shtypeshin rroba të falsifikuara dhe të kontrabanduara me markë, u arrestuan 4 persona dhe 2 të tjerë janë në kërkim. Grupi drejtohej nga…

 Një skemë e sofistikuar e kontrabandës dhe mashtrimit me veshje të falsifikuara është zbuluar nga Sektori për Hetimin e Krimit Ekonomik dhe Financiar në Shqipëri. Dy fabrika të mëdha, të ndodhura përgjatë rrugës së Arbrit, janë shfrytëzuar si pika për ruajtjen dhe ndryshimin e veshjeve të kontrabanduara, të cilat më vonë shiteshin si produkte të markave të njohura ndërkombëtare.

Në krye të kësaj aktiviteti kriminal është një qytetar turk, Ozkan Sulun, i cili tani është shpallur në kërkim nga organet e rendit. Hetimet kanë treguar se ai kishte krijuar një strukturë tërësore për të sjellë veshje kontrabandë – kryesisht nga Turqia – për t’i transformuar më pas në produkte të rreme me logot e kompanive të njohura si Hugo Boss, Calvin Klein, Air Jordan dhe Tommy Hilfiger.

Veshjet fillimisht futeshin në mënyrë ilegale në territorin shqiptar, më pas ruheshin në dy fabrika të pajisura me teknologji për stampimin e logove. Ato përgatiteshin që të duken si produkte autentike dhe hidhnin në treg duke mashtruar blerësit e zakonshëm.

Si pasojë e këtij operacioni, katër individë janë arrestuar: Luan Haka, Ali Bushati dhe Xhuljo Lecaj – të cilët janë administratorët e fabrikave – si dhe Arjan Hida, i cili kishte ofruar ambientet me qira. Po ashtu, dy persona të tjerë janë shpallur në kërkim: Lindion Haka, djali i Luan Hakës dhe gjithashtu administrator i një fabriku, si dhe Ozkan Sulun, kreu i këtij rrjeti.

Katër punonjës të zakonshëm të fabrikave do të hetohen në liri. Ndërkohë, hetimet vazhdojnë për të zbuluar të gjitha detajet e këtij rrjeti dhe për të identifikuar bashkëpunëtorë të tjerë të përfshirë në këtë aktivitet të paligjshëm.

Policia e Shtetit

Përfundon nga Sektori për Hetimin e Krimit Ekonomik dhe Financiar në Drejtorinë për Hetimin e Krimit Ekonomik dhe Financiar në DPPSh, operacioni policor i emërtuar “Fake Star 5”.

Zbulohet në Rrugën e Arbërit, dy magazina ku stampoheshin veshje të kontrabanduara, me logot falsifikuara.

Arrestohen katër individë të përfshirë në këto aktivitete kriminale.

Dy të tjerë shpallen në kërkim, një nga të cilët është shtetas turk.

Katër punonjës procedohen në liri.

Sekuestrohen sasi të mëdha veshjesh, dhjetëra makineri për qepje, printim ose stampim, logo të markave të njohura ndërkombëtare, gjashtë dokumente të shtetasit turk, një shumë lekësh, njësi kompjuterike, një celular, si dhe sende dhe dokumente të tjera që do t'i shërbejnë hetimit.

Si rezultat i operacioneve të inteligjencës policore, të siguruara gjatë punës për të luftuar kontrabandën dhe krimet e tjera ekonomiko-financiare, është vërtetuar se në Rrugën e Arbërit, në fshatin Brrar, magazinoheshin veshje të kontrabanduara me logo të falsifikuara nga markat e njohura. Sektori për Hetimin e Krimit Ekonomik dhe Financiar përfundoi operacionin “Fake Star 5”.

Gjatë operacionit:

- Pranga u vuri shtetasit Lindion Haka dhe po kërkohet djali i tij, Luan Haka, që është bashkadministrator në një nga magazinat;

- U arrestuan Ali Bushati dhe Xhuljo Lecaj, bashkadministratorë të një tjetër magazine;

- Shtetasi Arjan Hida, që jep pronat me qira, gjithashtu është arrestuar;

- Në kërkim është shpallur shtetasi turk Ozkan Sulun, i cili organizonte këto aktivitete kriminale;

- Materialet u dërguan në Prokurori, ku nisi procedimi në liri për shtetasit R. Gj. , Z. H. , Sh. M. dhe A. H. , punonjës në këto magazina.

Si pasojë e ndërhyrjes së shpejtë, u zbulua se dy magazinat kishin makina për qepje, printim dhe stampim me logo fallco, të markave të njohura ndërkombëtare, për veshje dhe aksesorë të dyshuar si të kontrabanduar.

Po punohet për kapjen dhe lokalizimin e dy shtetasve që janë shpallur në kërkim.

Procedurat janë dërguar në Prokurorinë e Tiranës për veprime të mëtejshme lidhur me krimet si "Shkelja e të drejtave të pronësisë industriale", "Punësimi i paligjshëm", "Kontrabanda me mallra të tjera", "Tregtimi dhe transportimi i mallrave të kontrabanduara", "Ruajtja ose depozitimi i mallrave kontrabandë", "Fshehja e të ardhurave", "Falsifikimi i vulave, stampave ose formularëve" dhe "Moskallëzimi i krimeve".